“Zorakılıq adət edilən, zamanla öyrənilən bir davranışdır”. Bu sözləri SİA-ya açıqlamasında sosioloq Lalə Mehralı deyib.

O bildirib ki, təəsüflə qeyd etmək olar ki, uşaqlar ailədən təsirlənir, zorakılığı elə ailəsindən öyrənir: “Uşaqlıq və yeniyetməlik dövründə məişət zorakılığının tez-tez yaşandığı bir ailədə böyüyənlərin zorakılığa meyilli olduğu müşahidə edilir. Bundan əlavə, zorakılıq ailədən-ailəyə miras kimi keçə bilən, nəsildən-nəsilə ötürülən davranış növüdür.

Ailədaxili zorakılıqdan ən çox zərər çəkənlər uşaqlardır. Ana-ata arasındakı mənəvi və fiziki basqının altında çox vaxt uşaqlar qalırlar. Valideynlər arasındakı anlaşmazlıqlardan, davalardan, zorakılıqdan uşaqların da payına düşür. Ailədaxili zorakılıq zamanı uşağa yönəlmiş, istər fiziki, istərsə də mənəvi basqı sərgiləyən hər cür davranış uşaq istismarı deməkdir”.

Müəllif: Samirə Nəsirova