“Ermənistan ordusunun tez-tez atəşkəsi pozması, ordunun rotasiya edilməsi, hərəkətliliyi, sürətlə silahlanması, həmçinin Ermənistanın ATƏT-in Minsk Qrupu adlı bədnamə institutundan imtina etmək istəməməsi, konstitusiyalarında Azərbaycana qarşı ərazi iddiası müddəasında imtina etməməsi, yəni bütün bunlar artıq Ermənistanın Azərbaycana qarşı növbəti genişmiqyaslı təxribatının, bir sözlə müharibəyə hazırlaşdığının göstəricidir”. Bu sözləri SİA-ya açıqlamasında Siyasi və Hüquqi Araşdırmalar Mərkəzinin (SHAM) sədri Xəyal Bəşirov deyib.

Onun sözlərinə görə, bütün addımlar, bütün hərəkətlilik məhz genişmiqyaslı təxribatdan xəbər verir: “Düşünürəm ki, Ermənistan tərəfinin 2020-ci il 10 noyabr tarixli bəyanatla əldə edilmiş atəşkəs rejimini pozması, həmin o dönəmdə atəşkəsin əldə edilməsini Azərbaycandan xahiş edən tərəf kimi, bu gün özünə gəlməsi və özünü növbəti dəfə Azərbaycana qarşı revanşist müharibəyə hazır olan tərəf kimi göstərir. Bunun reallıqları tamamilə fərqlidir. Amma hər bir halda Ermənistanın münasibəti və addımları bunu ortaya qoyur. Düşünürəm ki, Ermənistanın atəşkəsi pozmaqla bağlı atdığı addımlar artıq açıq şəkildə niyyətini ortaya qoyur. Buna qədər biz Ermənistanın silahlandığını deyirdik. ATƏT-in Minsk Qrupundan imtina etmək istəmirdi. Bütün bu addımlar Ermənistanın müharibəyə hazırlanmasını göstərən amillərdir. Artıq bu mərhələli şəkildə baş verən bu proseslərin Azərbaycanın sərhədlərində real addımlara keçməsi, həmçinin şərti sərhəd boyunca atəşkəsin pozulması müharibə olmasının işarətləridir”.

Xəyal Bəşirov həmçinin qeyd edib ki, biz bunların nəticələri ilə bağlı dəfələrlə mövqe bildirmişik: “Bu Ermənistana çox ağır başa gələcək. Amma hər bir halda tarixboyu müharibə edən tərəflər məğlub olub-olmayacağından asılı olmayaraq bu addımları atıblar. Ermənistan Azərbaycana Birinci Qarabağ müharibəsində özünün havadarları və dəstəkçilərinin köməyi ilə qalib gəlmişdi. Artıq İkinci Qarabağ müharibəsində ağır və acı məğlubiyyətə uğrayıb. Amma təbii ki, bu prosesin məntiqi ardıcıllığına baxsaq və Ermənistan tərəfinin atdığı addımlara baxsaq, müşahidə edirik ki, Ermənistan tərəfi revanşist müharibə istəyir. Yəni qisas almaq istəyir. Yəni bütün o niyyəti göstərəcək addımları Ermənistan atır. Ən sonuncuda şərti sərhədboyu ərazilərdə atəşkəsin pozması oldu”.