Türkiyə son dövrlərdə həm daxildə, həm də xaricdə intensiv dezinformasiya kampaniyalarına qarşı mübarizə aparır. Ana müxalifət partiyasındakı daxili çəkişmələr və bu prosesdə ictimaiyyətə əks olunan iddialar dəhşətvericidir. Təəssüf ki, bu qədər ciddi iddialar qarşısında utanc hissi keçirməli olanlar ictimai vicdana hesab vermək əvəzinə yalan və iftira siyasətini davam etdirir, manipulyasiyaya əl atırlar. SİA xəbər verir ki, bu ifadələr Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Fahrettin Altunun ölkədə baş verən son hadisələrə dair açıqlamasında yer alıb.

Altun, sosial media hesabından verdiyi açıqlamada Türkiyəyə qarşı iqtisadi sabitliyi və investor etimadını sarsıtmağa hesablanmış ifadələrin daxildəki bəzi dairələr tərəfindən xaricə ötürüldüyünü və bunun siyasi rəqabətdən daha çox milli mənafeyə qarşı sabotaj cəhdi olduğunu vurğulayıb.

Son hadisələrin ramazan ayında baş verdiyinə diqqət çəkən departament rəhbəri bunu dini dəyərlərə hörmətsizliklə yanaşı, təkcə siyasi ədəbsizlik deyil, həm də təşkilatlanmış şərin təzahürü kimi qiymətləndirib.

Türkiyənin gücünü milli iradədən alan rəhbərliklə yoluna qətiyyətlə davam etdiyini vurğulayan Altun siyasi rəqabətin təhdidlə deyil, prinsip və baxışla aparıldığını bildirib.