“Almaniya kimi Avropanın aparıcı dövləti ilə Azərbaycanın bu şəkildə təmasını yüksək qiymətləndirirəm. Azərbaycana müəyyən dərəcədə strateji əhəmiyyətli partniyor kimi yanaşılması, Azərbaycana güclü ölkə kimi qiymətləndirilməsi hamımız üçün sevindiricidir. Eyni zamanda, Almaniyanın atdığı müəyyən addımlarda Azərbaycanla bağlı fikirlərinin dəyişməsi də bizim tərəfimizdən təqdirlə qarşılanır”. Bu sözləri SİA-ya açıqlamasında deputat Fazil Mustafa deyib.

Fazil Mustafa sözlərinə belə davam edib: “Biz Avropa, başqa ölkələrlə, bizə qərəzli yanaşmayan bütün qüvvələrlə normal əməkdaşlıq saxlayırıq və gələcəkdə həm iqtisadi, həm siyasi əlaqələrin inkişafına maraqlıyıq. Bunu cənab Prezident də görüşdə xüsusilə vurğuladı. Ona görə də bu kimi məsələlərdə məncə yalnız gələcəyə, perspektivə baxıb əlaqələrin inkişafı istiqamətində addımlar atılmalıdır. Artıq Avropada Azərbaycanın öz ərazi bütövlüyünü bərpa etməsindən sonra onların da müəyyən dərəcədə əvvəlki tutumlarında dəyişikliklər baş verməlidir. Necə ki, baş verir. İndi bəzi dövlətlər, Fransa istisna olmaqla, artıq bu mövzu ilə bağlı lüzumsuz açıqlamalar vermirlər. Bu da bizim daha sərbəst əməkdaşlıq etməyimiz üçün şərait yaradır.

Çünki bizim üçün prioritet bir dəyər var – ərazi bütövlüyümüz. Bundan kənarda hansısa çağırışlar və ya neqativ davranışlar olmazsa, biz əməkdaşlığı davam etdirməyə hazırıq. Azərbaycanın bu haqlı mövqeyini də ölkə Prezidenti kifayət qədər geniş şəkildə ifadə edib və yəqin ki, ikitərəfli təmaslarda da dilə gətirib. Bu məsələdə münasibətlərimizin inkişafı indiki mərhələdə, həm də bölgə üzərindən digər manipulyasiyaların da ortadan qalxmasına kömək eləyər. Çünki Avropanın aparıcı dövlətləri artıq bu istiqamətdə müəyyən addımlar atırlarsa, Avropa Birliyinin qəbul etdiyi mənasız qətnamələr də boşa çıxır. Frasanında səyləri də boşa gedir. Ona görə də çalışmalıdırlar ki, Azərbaycanla normal münasibətlər qursunlar ki, Qafqazda proseslərdə, xüsusilə iqtisadi əməkdaşlıq platformasında yer ala bilsinlər”.

Ayşən Vəli