“Böyük Qayıdış artıq baş verib. Böyük Qayıdışa hazırlıq on illər bundan əvvəl başlamışdı”. Bunu SİA-ya açıqlamasında Milli Məclisin deputatı Aydın Mirzəzadə deyib.

O bildirib ki, həmin dövrdə torpaqlarımızın işğaldan azad olunacağı təqdirdə hansı işlərin ilk növbədə görüləcəyi, ardıcıl olaraq hansı məsələlərin həll ediləcəyi ilə bağlı xüsusi bir dövlət proqramı hazırlanmışdı: “Ona görə də Vətən müharibəsindən sonra dərhal və ilk növbədə işğaldan azad olunan ərazilərin vəziyyəti ilə bağlı geniş bir təftiş aparıldı. Məlum oldu ki, Ermənistan böyük dağıntı işi aparıb, mənzil fondu və sosial infrastruktur tamamilə məhv edilib, kommunikasiyalar zədələnib, təbiətə böyük ziyan vurulub. Eyni zamanda, geri çəkildikcə ərazilər minalanıb. Müharibədən sonra Azərbaycana qarşı mina terroru həyata keçirilir. Ərazilər minalardan təmizlənir, kommunikasiyalar bərpa edilir və ardıcıl surətdə artıq dağıdılmış ərazilərdə yeni yaşayış binaları və sosial obyektlər inşa olunur. Artıq 12 yaşayış məntəqəsinə qayıdış başlayıb. Bu il onların bir neçəsinin istifadəyə verilməsi gözlənilir. Hazırda 10.000-dən çox insan işğaldan azad olunan ərazilərdə məskunlaşıb. Təkcə məskunlaşma deyil, həmin insanların iş yeri məsələsi də əvvəlcədən düşünülüb. Arzu edənlər üçün kənd təsərrüfatı ilə məşğul olmaq üçün şərait yaradılır. Eyni zamanda, həmin ərazilərdə mədən sənayesinin inkişafı, sənaye parklarının tikintisi, istirahət zonalarının yaradılması da qayıdış planında nəzərdə tutulan məsələlər sırasındadır”.

Onun sözlərinə görə, ən vacib məsələlərdən biri də təhsil ocaqlarının yaradılmasıdır: “Bütün yaşayış məntəqələrində məktəblər və uşaq bağçaları fəaliyyət göstərərir. Xankəndidə Qarabağ Universitetinin yaradılması və fakültələrin işğaldan azad olunan rayon mərkəzlərində yerləşdirilməsi planı gələcək perspektivlər sırasındadır. Cəbrayıl, Füzuli və Zəngilanda hava limanlarının açılması, Laçında isə inşasının başa çatması göstərir ki, hava nəqliyyatının inkişaf etdirilməsi, həmin regionla əlaqələrin intensivləşməsi, turist axınının təşkili və eyni zamanda təsərrüfat fəaliyyəti üçün lazımi şəraitin genişləndirilməsinə böyük diqqət yetirilir. İllər keçdikcə biz işğaldan azad olunan ərazilərdə həm Azərbaycan, həm də dünya üçün nümunəvi olan yaşayış məntəqələri, sosial obyektlər və xidmət sahələri görəcəyik. Bütün bunlar Azərbaycan Prezidenti İlham Əliyevin milli maraqlarımıza və dövlətimizin mənafelərinə uyğun həyata keçirdiyi düşünülmüş daxili və xarici siyasətin nəticəsində baş verir”.