“Kəlbəcər işğal edildikdən sonra yerlə-yeksan edilmişdi, alt-üstə çevrilmişdi. Heç bir zərurət olmadan Kəlbəcərin bütün tikililəri məhv edilmişdi. Yəni azad edildikdən sonra biz oranı gördük, ürək ağrısı ilə izlədi. Həqiqətəndə insanlar nə qədər də vəhşiləşmiş olmalıdır ki, bu və ya digər şəkildə öz nəzarətinə keçirdiyi ərazinin altını üstünə çevirsin. Bəllidir ki, Kəlbəcərdə işğal edildiyi zaman güclü döyüşlər getməyib. Yəni geniş ərazini əhatə edən döyüşlər getməyib. Yəni orada dağıntıların olması üçün səbəb yox idi”. Bu sözləri SİA-ya açıqlamasında siyasi şərhçi Azər Həsrət deyib.

Onun sözlərinə görə, təbii ki, müəyyən dağıntılar olub, amma büsbütün dağıdılması üçün hər hansı səbəb olmayıb: “Belə bir şəraitdə artıq 30 ilə yaxın bir müddətdən sonra azad edilmiş Kəlbəcəri görəndə bir daha əmin olduq ki, düşmən həqiqətəndə çox amansız, qəddar insanlıqdan uzaqdır. İndi isə Kəlbəcərin işğaldan azad edilməsindən 5 il keçir. Bu müddət ərzində Azərbaycan dövləti, şəxsən Prezident İlham Əliyevin başçılığı altında oranın yenidən qurulması üçün böyük işlər görülür. Kəlbəcərin isti suyu artıq bizim süfrələrimizdədir. Azərbaycanın hər yerində əlçətandır. Yəni istehsal müəssisə qurulub. Arıçılıq təsərrüfatları haqqında məlumatları hamımız izləyirik. Arıçılar ora qayıdıblar və öz dədə-baba işləri ilə məşğuldurlar. Kəlbəcər şəhərinin bərpası istiqamətində böyük işlər görülür. Yeni yaşayış evləri tikilir və bu il kəlbəcərlilərin ilk heyətinin öz torpaqlarına dönəcəyi gözlənilir. Yəni Azərbaycan dövləti mümkün olandan da artıq edir ki, tikinti-quruculuq işləri aparılsın və o torpaqlar yenidən canlansın. Bizim dövlətimiz bununla dünyaya həmin yerlərin əsl sahibinin kim olduğunu göstərir. Ermənilər o torpağı ələ keçirdikdən sonra altını üstünə çevirib darmadağın etdilər, biz isə oranı azad etdikdən sonra tikib qururuq. Təbiidir ki, əsl sahibi olaraq oranı sahiblənirik. Bizim fərqimiz bundadır”.