Təqibdən sonra patrul qayıqları yaxtanı manqrov meşələrinə sürüblər…

…Xüsusi təyinatlılar və dəniz piyadaları Florida ştatında (ABŞ) 29 yaşlı Rusiya vətəndaşı Nikolay Vilkovu həbs ediblər – o, 2,5 milyon dollar dəyərində yedək gəmisi və 20 metrlik yaxta oğurlamaqda şübhəli bilinir.

SİA xəbər verir ki, bu barədə yerli “Miami Herald” nəşri məlumat yayıb.

Maraqlıdır ki, rus sonradan lüks bir gəmidə qaçmağa cəhd edib, lakin təqibdən sonra patrul qayıqları yaxtanı manqrov meşələrinə sürüb və təhlükəsizlik qüvvələri hücumçunu təslim olmaqdan imtina etdikdə saxlamaq üçün gözyaşardıcı qazdan istifadə ediblər.

Qeyd edək ki, Vilkov ilk cinayətini mayın 5-nə keçən gecə yedək gəmisini oğurlayaraq törədib. Lakin gəmi tezliklə quruya çırpılıb. Bir neçə saatdan sonra o, Tekestadakı Blowing Rocks Marinada yenidən peyda olub və özəl limandan üç göyərtəli yaxta oğurlayıb.

Saxlanılan zaman Vilkovun nə silahı, nə də rabitə vasitələri olub. Göyərtədə onun yalnız paltar dəyişikliyi tapılıb. O, avtomobilini dayanacaqda qoyubmuş.

Rusiyalının motivləri hələ də aydın deyil. O, oğurluğu etiraf edib, lakin dəqiq izahat verməyib.

Versiyalardan biri, mümkün qaçaqmalçılıq üçün Baham adalarına daşınmaq məqsədilə yaxtanın oğurlanması cəhdidir. İstintaqın fikrincə, gəminin həqiqətən də belə bir marşrut üçün kifayət qədər yanacaq ehtiyatı olub.

…Rus ingilis dilini bilmədiyini və sorğu-sual zamanı tərcüməçidən istifadə etdiyini bildirib.

Federal hakimiyyət orqanları Vilkovun Rusiya vətəndaşı olduğunu müəyyən ediblər. 2022-ci ilin noyabrında o, həyat yoldaşı və uşağı ilə birlikdə Türkiyədən Meksikaya uçub və həmin ilin dekabrında ABŞ sərhədini keçib.

Onun ABŞ sənədləri saxlanıldığı yerdən 1000 km aralıda Şimali Karolina ştatının Şarlotta şəhərində yaşadığını göstərib.

…30 aprel 2024-cü ildə həyat yoldaşı uşağı ilə birgə Rusiyaya geri uçub – onların getmə səbəbləri açıqlanmayıb.

Vilkov böyük oğurluq, polisdən ağır şəkildə qaçmağa cəhd və həbsə müqavimət göstərməkdə ittiham olunur.

Hazırda o, həbsdədir.

Əli Babayev