Məlumatı NATO da təsdiqləyib…

…NATO nümayəndələrinin təsdiq etdiyi son peyk görüntülərinə görə, Rusiya qoşunları Finlandiya ilə sərhəd yaxınlığında hərbi infrastrukturu fəal şəkildə gücləndirir.

SİA-nın məlumatına görə, bu barədə “The New York Times” yazır.

Peyk görüntüləri yeni cərgə çadırları, hərbi texnikanın saxlandığı yerləri, döyüş təyyarələri üçün yenilənmiş anqarları və əvvəllər tərk edilmiş helikopter bazasında bərpa işlərini göstərir.

Bu, hələ də böyük genişlənmənin ilkin mərhələsi olsa da, hərbi ekspertlər bildirirlər ki, hazırkı yığılma 2022-ci ildə tammiqyaslı işğaldan əvvəl Ukrayna ilə sərhəddə olanlarla müqayisədə heç nə deyil.

Hazırda Finlandiya sərhədi boyunca az sayda rus qoşunu yerləşdirilib və Finlandiya hakimiyyəti mövcud vəziyyəti ciddi təhlükə hesab etmir.

Xatırladaq ki, Finlandiya iki il əvvəl NATO-ya üzv olub. Rusiya ilə sərhədin uzunluğu demək olar ki, 1330 kilometrdir – bu, bütün NATO ölkələri arasında ən uzun sərhəddir. Arktika da daxil olmaqla bu bölgə yeni alov nöqtəsinə çevrilə bilər.

Arktikada bu yaxınlarda keçirilən hərbi təlimlərə Amerika və Finlandiya hərbçiləri cəlb olunub. Ukraynada döyüşlər dayandırılsa, Rusiya Finlandiya sərhədinə minlərlə hərbçi yerləşdirəcək və yaxın 5 il ərzində bölgədəki qoşunların sayının üç dəfə artacağı gözlənilir, Finlandiya hərbi rəsmiləri deyirlər.

Ekspertlər Rusiya qoşunlarının gələcəkdə xüsusilə NATO-ya bitişik ərazilərdə artırılacağını bildirirlər.

Peyk məlumatları vertolyotların 20 ildən çox olmadıqları Murmansk yaxınlığındakı bazaya qayıtdığını göstərir.

Bundan əlavə, Estoniya və Rusiyanın şimal-qərbindəki digər bölgələr yaxınlığındakı bazalarda aktivlik artır.

Finlandiya hərbi rəsmiləri qeyd edirlər ki, bölgədə Rusiya qoşunlarının sayının artırılması Ukraynada hərbi əməliyyatlar başa çatdıqdan sonra baş verəcək.

Əli Babayev