“Son illərdə Azərbaycana avtomobil idxalında əsas dəyişikliklər müşahidə olunur. 2024-cü ilin statistikalarına əsasən, ölkəmizə ən çox avtomobil idxal olunan ölkələr sırasında Asiya dövlətləri ön sıralarda yer alır”. Bu sözləri SİA-ya açıqlamasında nəqliyyat üzrə ekspert Aslan Əsədov deyib.

Onun sözlərinə görə, birinci yerdə Cənubi Koreya dayanır. Bu ölkədən Azərbaycana 22,279 ədəd avtomobil idxal edilib: “İkinci yerdə isə 19,404 avtomobillə Çin qərarlaşıb. Yaponiya isə 12,221 avtomobillə üçüncü yerdədir. ABŞ-dan 10,357, Almaniyadan isə 5,900 avtomobil gətirilib. Meksika (5,464) və Böyük Britaniya (2,143) da idxalda nəzərəçarpacaq paya malik ölkələr sırasındadır.

Digər ölkələrdən, məsələn Rusiya, Cənubi Afrika Respublikası, Çexiya, Slovakiya, İspaniya və İtaliyadan idxal olunan avtomobillərin sayı isə 1,000-dən az olub. Əvvəllər Azərbaycana avtomobil ixrac edən əsas ölkələrdən biri olan Gürcüstandan idxal son illərdə azalıb. 2024-cü ilin yanvar-fevral aylarında Gürcüstandan cəmi 1,266 avtomobil idxal olunub ki, bu da ötən ilin eyni dövrü ilə müqayisədə 27% azalma deməkdir.

Ümumilikdə, bu göstəricilər Azərbaycana avtomobil idxalında Asiya ölkələrinin, xüsusilə də Cənubi Koreya, Çin və Yaponiyanın rolunun artdığını göstərir. Bu ölkələrdən həm yeni, həm də ikinci əl avtomobillərin idxalı üstünlük təşkil edir. Çin və Koreya avtomobillərinə olan tələbatın kəskin artması da bu tendensiyanı təsdiqləyir”.