Yaponiyaya səyahət daha çox tənzimlənəcək. Ölkə hökuməti müalicə xərclərini ödəmək və yerli xəstəxanaların yükünü azaltmaq üçün turistlərdən tibbi sığorta almağı tələb etmək niyyətindədir.

SİA-nın məlumatına görə, Yaponiya hökuməti bütün xarici turistlər üçün yeni məcburi qayda tətbiq etməyə hazırlaşır: özəl tibbi sığorta.

2026-cı ildən etibarən qüvvəyə minə biləcək tədbir ödənilməmiş tibbi ödənişlərlə bağlı artan problemi həll etmək və ölkənin səhiyyə sistemindəki maliyyə yükünü azaltmaq məqsədi daşıyır.

Hökumət, xarici ziyarətçilərin tibbi yardım aldıqları, lakin ödənişlərini ödəmədən getdikləri hallarla məşğul olmaqdan yorulduğunu söyləyir.

Yaponiya Səhiyyə Nazirliyinin məlumatına görə, cəmi bir ay ərzində 90-a yaxın turist 425 min dollardan çox borc qoyub. Yeni qaydalar bütün gözlənilməz tibbi xərclərin ödənilməsini təmin etmək üçün nəzərdə tutulub.

Gücləndirilmiş nəzarətin bir hissəsi olaraq, immiqrasiya xidməti borcluların siyahılarına çıxış əldə edəcək və əvvəllər tibbi xidmətlər üçün ödəniş etməmiş turistlərə yenidən giriş qadağan edilə bilər.

…Xaricdən gələn işçilərin və turistlərin sayı artdıqca, vətəndaşlar arasında narahatlıq doğuran hallar var, -deyə Yaponiyanın Baş naziri İşiba Şiqeru yeni qaydaların məqsədini açıqlayıb.

Bu addımlar turist axınındakı rekord artım fonunda atılır. Yaponiya Milli Turizm Təşkilatının məlumatına görə, 2024-cü ildə Rusiyadan bu ölkəyə təxminən 100 min turist səfər edib ki, bu da əvvəlki illə müqayisədə iki dəfə çoxdur.

2025-ci ilin mart ayında ümumi turist axını təxminən 3,5 milyon əcnəbi təşkil edib və 2030-cu ilə qədər səlahiyyətlilər illik axının 60 milyon nəfərə qədər artacağını gözləyirlər. İcbari sığortanın tətbiqi ilə paralel olaraq Yaponiya da fiskal siyasətini sərtləşdirir: o, turist vergisini artırmağı və rüsumsuz ticarət qaydalarını dəyişməyi planlaşdırır.

Nazlı Almuradova