Tramp sosial şəbəkədə Rutte ilə yazışmalarını sızdırıb

NATO-nun baş katibi Mark Rutte ABŞ prezidenti Donald Trampı İrandakı “qətiyyətli addımı” münasibətilə təbrik edib. SİA-nın məlumatına görə, “İzvestiya” xəbər verir ki, ABŞ lideri müvafiq yazışmaları özünün “Truth Social” səhifəsində dərc edib.

Rutte Trampın qərarını “həqiqətən diqqətəlayiq” adlandırıb. NATO baş katibinin sözlərinə görə, “başqa heç kim bunu etməyə cürət etməzdi”.

…Bu, hamımızı daha təhlükəsiz edir. Siz daha bir böyük uğura doğru gedirsiniz – bu axşam Haaqada… Bu, asan deyildi, lakin biz hamını beş faiz (ölkə ÜDM-dən hərbi xərclərin) üçün qeydiyyatdan keçməyə inandırdıq!

Bunu deyən Rutte əlavə edib ki, Avropa böyük bədəl ödəyəcək, lakin bunun Trampın şəxsi qələbəsi olacağını vurğulayıb.

Xatırladaq ki, həftə sonu ABŞ İsraillə İran arasında münaqişəyə girmişdi. İyunun 22-nə keçən gecə Vaşinqton İranın Fordo, Natanz və İsfahandakı nüvə obyektlərinə zərbələr endirib.

Əli Babayev