“Bu il yay mövsümünün gecikməsi və qeyri-sabit hava şəraiti dənizkənarı obyektlərə, istirahət mərkəzlərinə və ümumiyyətlə turizm sektoruna nəzərəçarpacaq dərəcədə mənfi təsir göstərib. Adətən yay mövsümünün əvvəlindən etibarən müşahidə olunan aktivlik bu il kifayət qədər gec başlayıb. Mövsümün əsas qazanc dövrünün qısalması nəticəsində obyekt sahibləri əvvəlcədən yatırdıqları investisiyaların – məsələn, infrastrukturun bərpası, texniki hazırlıq, işçi heyətinin işə götürülməsi və reklam xərclərinin – geri dönüşünü əldə etməkdə çətinlik çəkirlər. Bu təzyiq nəticəsində bəzi sahibkarlar çıxış yolunu giriş haqqını süni şəkildə yüksəltməkdə görürlər”. Bu sözləri SİA-ya açıqlamasında turizm üzrə ekspert Əziz Şiriyev deyib.

Onun sözlərinə görə, əksər hallarda mənfi nəticələr doğurur. Çünki insanlar yüksək qiymətlərlə qarşılaşdıqda həmin məkanlara getməkdən çəkinir və nəticədə obyektlərə olan maraq azalır. Xüsusilə qeyd olunmalıdır ki, istirahət obyektlərinin əsas ziyarətçi qrupu ailələrdir. Ailəvi istirahət edənlər üçün giriş qiymətləri ciddi amildir. Dörd-beş nəfərlik bir ailənin birdən-birə yüksək məbləğdə giriş haqqı ödəməsi, üstəlik içəridə digər xərcləri də nəzərə alması, onların qərarına birbaşa təsir edir: “Belə olan halda, istirahət mərkəzlərinə olan tələbat azalır, bu da nəticə etibarilə obyektin ümumi gəlirinə mənfi təsir göstərir. Əgər məqsəd daha çox gəlir əldə etməkdirsə, bunun yolu müştəri sayını artırmaqdan keçir. Bunun üçün isə qiymət siyasəti yenidən nəzərdən keçirilməlidir. Ən optimal və səmərəli yanaşma giriş haqqını daha münasib səviyyədə saxlamaq, əvəzində obyekt daxilində əlavə xidmətlər və əyləncə imkanları yaratmaqdır. Məsələn, içəridə yerləşən kafe və restoranlar, attraksionlar, uşaq əyləncə zonaları, su oyunları və digər pullu xidmətlər obyekt sahibinə əlavə gəlir mənbəyi təqdim edə bilər. Bu zaman insanlar daha asanlıqla daxil ola bilər, sərbəst şəkildə xidmətlərdən faydalanar və nəticədə ümumi gəlir daha davamlı və dayanıqlı şəkildə təmin olunar.

Bu yanaşma yalnız sahibkarlıq baxımından deyil, həm də müştəri məmnuniyyəti baxımından olduqca əhəmiyyətlidir. İnsanlar öz büdcələrinə uyğun şəkildə keyfiyyətli istirahət edə bildikdə həmin məkanlara qarşı müsbət fikir formalaşır. Bu isə gələcəkdə həmin ailələrin və şəxslərin həmin obyektləri yenidən seçməsinə səbəb olur. Beləliklə, müştəri məmnuniyyəti, reputasiya və gəlirlilik bir-birini tamamlayan mühüm amillərə çevrilir.

Yekun olaraq demək olar ki, bu cür çətin mövsümlərdə ağıllı idarəetmə strategiyaları, qiymət siyasətində çeviklik və müştəri yönümlü yanaşma sahibkarların uğurlu fəaliyyətini təmin edə bilər. Qısamüddətli qazanc deyil, uzunmüddətli etibarlılıq və müştəri bazasının genişlənməsi əsas hədəf olmalıdır. Dövlət qurumları və aidiyyəti sahibkar birlikləri də bu məsələyə diqqətlə yanaşmalı, sahibkarlara maarifləndirici dəstək göstərməlidir ki, turizm sektoru çətin mövsümlərdə belə dayanıqlılığını itirməsin”.