Qlobal risklərin artması fonunda İsveç böhran və ya müharibənin baş verdiyi şəraitdə əhalini ərzaqla təmin etmək hazırlığını qiymətləndirib. SİA xəbər verir ki, İsveç Ərzaq Agentliyinin və Kənd Təsərrüfatı İdarəsinin hesabatına əsasən, ölkədə 14 milyona qədər insanı doydurmaq üçün kifayət qədər ərzaq istehsal olunur, halbuki əhalinin sayı təxminən 10 milyon təşkil edir.

Agentliyin qeyd etdiyi kimi, belə şəraitdə qida rasionu o qədər də rəngarəng olmazdı. Qida rasionunun əsasını taxıl, kartof, çörək, süd məhsulları və yumurta təşkil edərdi. Xüsusilə də qışda təzə meyvə və tərəvəzlərin idxalı tədarükün pozulduğu halda, bu kateqoriyaları həssas edir.

Mağazalarda və əhalidə minimal ehtiyatların olması əlavə problem olaraq qalır. Yeni təchizat olmasa, rəflər iki həftəyə boşala bilər. Bundan əlavə, hökumətin tövsiyələrinə baxmayaraq, vətəndaşların əksəriyyəti hətta bir həftəlik qida və su ehtiyatına belə malik deyil.

İsveç, həmçinin kənd təsərrüfatı istehsalı üçün zəruri olan duz və gübrələr kimi idxal resurslarından da asılıdır. Bunların çatışmazlığı ərzaq təhlükəsizliyinə ciddi şəkildə təsir göstərə bilər. Məhsulların istehsalı Skone və Vestra Hetaland bölgələrində cəmləşmişdir ki, bu da nəqliyyat çətinlikləri olduqda risklər yaradır.

Böhran və ya münaqişə şəraitində logistika, xüsusilə həssas olur: nəqliyyat infrastrukturu müdafiə ehtiyacları üçün istifadə edilə bilər ki, bu da təchizatda fasilələrə səbəb ola bilər. Ekspertlər istehsalın şaxələndirilməsinin və ərzaq ehtiyatlarının gücləndirilməsinin vacibliyini vurğulayırlar.