“Azərbaycan çoxşaxəli xarici siyasət taktikasını həyata keçirməkdədir. Xüsusilə də Orta Asiya Türk dövlətləri ilə sıx təmaslarını genişləndirməkdədir. Bu əlaqələr həm ikitərəfli, həm də çoxtərəfli formatda aparılır. Bildiyiniz kimi, Azərbaycan Türk Dövlətləri Təşkilatı çərçivəsində Orta Asiya Türk dövlətləri ilə əməkdaşlıq edir, eyni zamanda MDB məkanında da bu dövlətlərlə sıx əməkdaşlıq həyata keçirir”. Bu sözləri SİA-ya açıqlamasında politoloq Azad Məsiyev deyib.

Politoloq bildirib ki, buna baxmayaraq, Azərbaycan həmin dövlətlərlə ikitərəfli münasibətlər çərçivəsində də yüksək səviyyəli əlaqələr qurmaqdadır: “Bildiyiniz kimi, hər bir Orta Asiya Respublikası ilə, Türk dövlətləri ilə təmaslarını genişləndirməkdədir. Bu, Azərbaycanın Türk dövlətləri birliyinin yaradılması prosesində fəal iştirak etdiyini göstərir.

Azərbaycan və Türkiyə, Türk Dövlətləri Təşkilatının fonunda Turan İttifaqının formalaşması üçün ciddi səylər göstərir. Bu məqsədlə həm siyasi, həm də iqtisadi təmaslarını genişləndirməkdədir. Qeyd etmək lazımdır ki, Orta Asiya respublikalarının hər biri ilə bu təmaslar geniş vüsət almışdır. Bildiyiniz kimi, Özbəkistan, Qazaxıstan kimi ölkələrdən Azərbaycana rəsmi səfərlər həyata keçirilir və eyni zamanda Azərbaycan Prezidenti də bu dövlətlərə səfərlər edir.

Qırğızıstan Prezidentinin Azərbaycana səfəri, eyni zamanda Qırğız xalqının nümayəndəsi kimi onun bu səviyyədə iştirak etməsi, Azərbaycanın həyata keçirdiyi xarici və iqtisadi siyasətin mühüm tərkib hissəsidir. Bu istiqamətdə Azərbaycan fəallığını ardıcıl şəkildə artırır”.

Onun sözlərinə görə, xatırlatmaq yerinə düşər ki, Azərbaycan Prezidenti andiçmə mərasimində və parlamentdəki çıxışında belə bir fikri səsləndirmişdir: “Bizim evimiz Türk dünyası evidir.” Bu yanaşma əsasında Azərbaycan həm ikitərəfli, həm də çoxtərəfli formatda Türk dövlətləri ilə əməkdaşlığını genişləndirməkdədir.

Qırğızıstan ilə Azərbaycan arasında iqtisadi və siyasi münasibətlərin möhkəmləndirilməsi xüsusi əhəmiyyət kəsb edir. Çünki Orta Asiya Respublikalarının iqtisadi inkişafı, ümumilikdə, Türk Dövlətləri Təşkilatının güclənməsinə yönəlmiş strateji xəttin bir hissəsidir. Bu xalqlar arasında mənəvi, iqtisadi və siyasi inteqrasiyanın dərinləşməsi olduqca vacibdir. Belə inteqrasiya həm ikitərəfli, həm də çoxtərəfli əməkdaşlıq çərçivəsində qarşılıqlı anlaşmanı asanlaşdırır və daha effektiv nəticələrin əldə olunmasına zəmin yaradır. Bu çərçivədə Qazaxıstan Prezidentinin Azərbaycana səfəri iki dövlət arasında münasibətlərin daha da inkişafına yönəlmiş əhəmiyyətli bir addımdır. Bildiyiniz kimi, hazırda Türk dövlətləri arasında ortaq əlifba layihəsi də gündəmdədir ki, bu da mənəvi inteqrasiyanın mühüm göstəricilərindən biridir.

Hesab edirəm ki, bu cür səfərlərin intensivləşdirilməsi, yəni əlaqələrin tez-tez və sistemli şəkildə möhkəmləndirilməsi ümumi əməkdaşlıq üçün müsbət nəticələr verir. Bu proses həm Qırğız xalqının, həm də Azərbaycan xalqının milli maraqlarına tam uyğun gəlir və qarşılıqlı faydaya xidmət edir”- deyə o əlavə edib.