“Avtomobillərin texniki xidməti və təmiri zamanı detalları dəyişdirmək zəruri ola bilər. Lakin bu dəyişikliklər, xüsusilə də ikinci əl bazarında, nəqliyyat vasitəsinin qiymətinə həm müsbət, həm də mənfi təsir göstərə bilər”. Bu sözləri SİA-ya açıqlamasında avtomobillər üzrə texniki ekspert Razil Nağıyev deyib.

Razil Nağıyev sözlərinə belə davam edib: “Detalın növü, keyfiyyəti, mənşəyi və dəyişdirilmə səbəbi bu təsirin miqyasını müəyyən edən əsas amillərdir.

Müsbət təsir

Əgər avtomobildə dəyişdirilən detal orijinal, yeni və sertifikatlı istehsalçılar tərəfindən təmin edilmiş bir hissədirsə, bu, avtomobilin texniki vəziyyətini yaxşılaşdırır. Xüsusilə mühərrik, transmissiya, əyləc sistemi, sükan sistemi və digər əsas təhlükəsizlik komponentləri kimi vacib detalların yenilənməsi nəqliyyat vasitəsinin daha etibarlı və uzunömürlü olmasını təmin edir. Bu da təbii olaraq avtomobilin bazar dəyərinə müsbət təsir edir. Belə vəziyyətdə alıcı avtomobilin texniki baxımdan daha yaxşı vəziyyətdə olduğunu görür və əlavə pul ödəməyə daha meyilli olur.

Məsələn, uzun müddət istifadə olunan və aşınmış bir mühərrikin yenisi ilə əvəzlənməsi avtomobilin performansını artırır, yanacaq sərfiyyatını optimallaşdırır və alıcı üçün əlavə cəlbedici faktor yaradır. Bu səbəbdən bəzi hallarda avtomobilin qiyməti əvvəlkindən daha yüksək ola bilər.

Mənfi təsir

Əksinə, əgər avtomobildə dəyişdirilən detalları qeyri-original, ucuz, keyfiyyətsiz və ya ikincil bazardan alınan hissələrlə əvəz edirlərsə, bu, avtomobilin dəyərini azalda bilər. Bu cür detallar, ilk baxışda yeni görünsə də, uzunmüddətli etibarlılıq və təhlükəsizlik baxımından zəif nəticə verə bilər.

Xüsusilə qəzadan çıxmış avtomobillərdə istifadə olunan detallarla bağlı bazarda müəyyən bir narahatlıq var. Belə avtomobillərin bərpası zamanı istifadə edilən hissələrin keyfiyyəti və düzgün quraşdırılması alıcı üçün riskli hesab olunur. Nəticədə, bu cür dəyişikliklər avtomobilin bazar dəyərinə mənfi təsir göstərir və alıcının etimadını azalda bilər. Hətta avtomobilin satışı zamanı bu dəyişikliklər sənədlərdə qeyd olunmadıqda, sonradan aşkar edilməsi hüquqi problemlər də yarada bilər.

Avtomobildə detalları dəyişmək hər zaman avtomobilin dəyərinə təsir edir. Bu təsirin müsbət və ya mənfi olması, detalları hansı məqsədlə, hansı keyfiyyətdə və necə dəyişdiyinizdən asılıdır. Əgər məqsəd avtomobilin texniki vəziyyətini yaxşılaşdırmaq və orijinal vəziyyətə yaxınlaşdırmaqdırsa, bu alqışlanmalıdır. Lakin ucuz və qeyri-standart detal dəyişiklikləri qısamüddətli həll olsa da, uzunmüddətli perspektivdə həm avtomobilin dəyərini, həm də etibarını azalda bilər”.

Ayşən Vəli