Taypey metrosunda 135 stansiya və 150 km yol var…

…Tayvan ordusu hipotetik Çin işğalı qarşısında bu günə qədər keçirdiyi ən böyük illik təlim zamanı ilk dəfə Taypey metrosundan qoşun və təchizat daşımaq üçün istifadə etdi. SİA-nın əldə etdiyi məlumata görə, bu barədə TWZ yazır.

Yeraltı xətlər yerüstü hədəflərə hava zərbələri endirilməsi halında hərəkətliliyi təmin edə bilən qorunan infrastruktur kimi görülür.

Hərbi polis və Ordu Logistika Komandanlığı bölmələri metronun sərnişinlərə bağlı olduğu bir vaxtda stansiyalar arasında təlim keçirib. Əsgərlər Stinger insan daşına bilən hava hücumundan müdafiə sistemləri, pulemyotlar və tank əleyhinə raketlər də daxil olmaqla avadanlıqları hərəkət etdirmək üçün standart vaqonlardan və xüsusi platformalardan istifadə ediblər.

Təlim ordunun döyüş şəraitində şəhər infrastrukturundan mülki strukturlarla birgə istifadə etmək bacarığını nümayiş etdirir.

100-ə yaxın hərbçi metronu tərk edərək şəhər küçələrində təlimləri davam etdirib.

Taypey metrosunda 135 stansiya və 150 km yol var, onların əksəriyyəti yeraltıdır.

Münaqişə halında bu, üstünlüyü təmin edir – hərəkətin gizliliyi, hava zərbələrindən qorunma və pusqu qurmaq imkanı. Bununla belə, ekspertlər xəbərdarlıq edirlər ki, metrodan istifadə Çin hərbi hücumlarının hədəfinə çevrilərsə, mülki əhalinin həyatını riskə ata bilər.

Risklərə baxmayaraq, bu addım Tayvanın potensial təcavüzə qarşı ümumi ictimai dayanıqlığını gücləndirmək öhdəliyini nümayiş etdirir.

Əli Babayev