Çad məhkəməsi ölkənin keçmiş baş naziri Syukse Masraya 20 il həbs və 1,6 milyon dollar cərimə kəsib. SİA xəbər verir ki, bu barədə Çadın “Alwihda” xəbər portalı məlumat yayıb. Məlumata görə, Masra silahlı üsyana çağırışda təqsirli bilinib. Məhkəmədə sübut kimi onun 2023-cü ildəki çıxışının audioyazısından istifadə edilib. Müdafiə tərəfi iddia edib ki, bunlar terrorizmlə mübarizə ilə bağlı kontekstdən çıxarılan ifadələrdir. Prokurorluq sabiq baş nazirə 25 il həbs cəzası istəyib. Çadın aparıcı müxalifət partiyası olan Transformers partiyasına rəhbərlik edən Masra məhkəmədəki son ifadəsində tərəfdarlarını sakit olmağa çağırıb. O, bu il mayın 16-da həbs edilib. 41 yaşlı Masra 2024-cü ilin yazında Çadda keçirilən prezident seçkilərində səslərin 18,5 faizini qazanıb. O, hazırkı prezident Mahamat İdris Debi İtnoya uduzub. Müxalifət lideri səsvermənin nəticələrini tanımaqdan imtina edib.