“Qarabağda bərpa olunan iqtisadi fəaliyyətin ölkə iqtisadiyyatına təsiri çox geniş və çoxşaxəlidir. İşğaldan azad edilmiş ərazilərdə aparılan quruculuq və bərpa prosesləri təkcə həmin bölgənin inkişafını təmin etmir, eyni zamanda Azərbaycanın ümumi iqtisadi strategiyasına yeni dinamika gətirir. Bu fəaliyyətlər kənd təsərrüfatından sənayeyə, nəqliyyatdan turizmə qədər bir çox sektoru əhatə edir və ölkənin dayanıqlı inkişafına xidmət edir”. Bu sözləri SİA-ya açıqlamasında iqtisadçı ekspert Emin Qəribli deyib.

Onun sözlərinə görə, əvvəlcə kənd təsərrüfatı sahəsini xüsusi qeyd etmək lazımdır. Qarabağ torpaqları yüksək məhsuldarlığı ilə seçilir və kənd təsərrüfatı üçün çox əlverişli şəraitə malikdir. Uzun illər istifadəsiz qalmış ərazilərin yenidən əkin dövriyyəsinə qaytarılması ölkənin ərzaq təhlükəsizliyini gücləndirəcək, idxaldan asılılığı azaldacaq və kənd təsərrüfatı məhsullarının ixrac potensialını artıracaq. Bu isə ticarət balansına müsbət təsir göstərəcək və valyuta gəlirlərinin artmasına səbəb olacaq: “İkinci mühüm istiqamət sənaye və istehsal sahəsidir. Qarabağda sənaye parkları və azad iqtisadi zonaların yaradılması planlaşdırılır. Bu zonalara yerli və xarici sərmayələrin cəlb edilməsi yeni istehsal müəssisələrinin fəaliyyətə başlamasına şərait yaradacaq. Nəticədə həm daxili bazar güclənəcək, həm də ixrac üçün rəqabətqabiliyyətli məhsullar istehsal ediləcək. Bu da Azərbaycanın sənaye sektorunun şaxələnməsinə və iqtisadiyyatın neftdən asılılığının azalmasına xidmət edəcək. Nəqliyyat və logistika infrastrukturunun qurulması da Qarabağın iqtisadi potensialını artıran əsas amillərdəndir. Bölgədə yeni avtomobil yolları, dəmir yolları və hava limanlarının istifadəyə verilməsi Azərbaycanın tranzit imkanlarını genişləndirəcək. Qarabağın strateji mövqeyi nəzərə alındıqda, bu regionun regiondaxili və beynəlxalq nəqliyyat qovşağına çevrilməsi ölkənin logistika sahəsində rolunu gücləndirəcək və əlavə iqtisadi dividendlər qazandıracaq.

Turizm sektoru da xüsusi vurğulanmalıdır. Qarabağın zəngin təbiəti, mədəni irsi və tarixi abidələri bu bölgəni gələcəkdə turizm mərkəzinə çevirə bilər. İnfrastrukturun bərpası və təhlükəsizlik təmin olunduqdan sonra Qarabağa yerli və xarici turist axınının artması gözlənilir. Bu isə xidmət sektorunun inkişafını, yeni iş yerlərinin açılmasını və əlavə gəlir mənbələrinin yaranmasını təmin edəcək. Sosial baxımdan da Qarabağda bərpa olunan iqtisadi fəaliyyət mühüm nəticələr doğuracaq. Yeni iş yerlərinin yaradılması, əhalinin bölgəyə qayıdışı, yaşayış məntəqələrinin bərpası və sosial xidmətlərin inkişafı insanların rifah səviyyəsini yüksəldəcək. Bu proses təkcə Qarabağ əhalisinə deyil, bütövlükdə ölkə iqtisadiyyatına müsbət təsir göstərəcək, sosial sabitliyi möhkəmləndirəcək.

Qarabağın iqtisadi potensialı Azərbaycanın ümumi iqtisadi strategiyasının ayrılmaz hissəsinə çevrilir. Burada həyata keçirilən bərpa və inkişaf layihələri ölkənin iqtisadi şaxələnməsinə, dayanıqlı artıma və beynəlxalq iqtisadi mövqeyinin güclənməsinə xidmət edəcək. Qarabağda canlanan iqtisadi həyat, həm regional, həm də milli miqyasda böyük bir iqtisadi dönüş nöqtəsi olacaq”.