Ölkədə yanacaq qıtlığı artır…

Ukraynanın Rusiya neft emalı zavodlarına hücumlarının sayının artması səbəbindən Rusiyada benzinin qiyməti rekord həddə yüksəlib.

SİA-nın məlumatına görə, bu barədə CNN yazır.

Nəşr qeyd edib ki, Ukrayna öz hücumlarını neftayırma zavodlarına, nasos stansiyalarına və yanacaq qatarlarına yönəldir, Rusiya hərbi maşınına zərər vurmağa və ölkədə gündəlik həyatı pozmağa çalışır.

Qeyd olunur ki, yayda rusiyalı sürücülər və fermerlər arasında benzinə tələbat ən yüksək həddə çatır.

CNN-in məlumatına görə, təkcə bu ay Ukrayna pilotsuz təyyarələri Rusiya Federasiyasının ən azı on əsas enerji obyektinə hücum edib.

…Görünür, bu strategiya işləyir. Ukrayna kəşfiyyatının məlumatına görə, zərər çəkmiş neft emalı ildə 44 milyon tondan çox məhsul təşkil edir ki, bu da Rusiyanın imkanlarının 10 faizini üstələyir, – nəşr xatırladır.

Hədəflərdən biri Rusiyanın cənubunda ən böyük olan Volqoqraddakı nəhəng Lukoil neft emalı zavodu idi.

…CNN avqustun 14-də səhər tezdən hücuma məruz qalan zavoddan yüksələn tüstü buludlarının yerini müəyyən edib. Rusiya Müdafiə Nazirliyi avqustun 19-da yenidən hücuma məruz qalan zavoda dəyən ziyanı etiraf edib, – məqalədə əlavə edilib.

Eyni zamanda Ukraynanın xarici kəşfiyyat xidməti bildirib ki, Rusiya şirkətləri daxili qıtlıq problemini həll etmək üçün təcili olaraq Belarusdan neft alırlar.

Ukrayna da Rusiyanın neft ixracına müdaxilə etməyə çalışır. Keçən həftə Ukrayna pilotsuz təyyarələri Rusiya neftini Macarıstan və Slovakiyaya – hökumətləri Moskva ilə yaxşı münasibətləri olan iki Aİ ölkəsinə tədarük edən “Drujba” kəmərinə hücum edib.

Öz növbəsində, analitiklər Rusiyanın minlərlə yanacaqdoldurma məntəqəsinin yanacaqsız qalmayacağına inansalar da, tədarükün kəsilməsinin yüksək inflyasiyanı pisləşdirəcəyini və benzinin ixracına qoyulan qadağanın payıza qədər uzadılmasına səbəb olacağını qeyd ediblər.

Əli Babayev