29 avqust 2025-ci il tarixində 14 saylı Xəzər–Pirallahı seçki dairəsindən seçilmiş millət vəkili Günay Əfəndiyeva Pirallahı rayonunda bir sıra görüşlərdə iştirak etmişdir. SİA-nın verdiyi məlumata görə, Pirallahı Rayon İcra Hakimiyyətinin başçısı Vasif İmanovla birgə rayonda böyük hörmətə malik olan, Pirallahı Rayon Ağsaqqallar Şurasının üzvü, veteran neftçi Səməd Əhmədovun dəfn mərasimində iştirak edən millət vəkili mərhumun ailəsinə və yaxınlarına dərin hüznlə başsağlığı vermiş, onun uzun illər ərzində ölkəmizin neft sənayesində göstərdiyi xidmətlərin və ağsaqqal kimi cəmiyyətə verdiyi mənəvi töhfələrin daim ehtiramla xatırlanacağını bildirmişdir. Dəfn mərasimində çıxış edən Rayon İcra Hakimiyyətinin başçısı Vasif İmanov isə ağsaqqalların xalqımızın mənəvi dayağı, zəngin həyat təcrübəsinin daşıyıcısı olaraq cəmiyyətin inkişafında və gənc nəslin tərbiyəsində mühüm rol oynadığını xüsusi vurğulamışdır.

Daha sonra Millət vəkili Günay Əfəndiyeva, RİH başçısı Vasif İmanov və RİH başçısı Aparatının məsul əməkdaşları Gürgən qəsəbə qəbiristanlığında şəhid məzarlarını ziyarət etmiş, ölkəmizin ərazi bütövlüyü uğrunda canlarını fəda etmiş qəhrəman Vətən övladlarının əziz xatirəsini ehtiramla yad etmişlər.

Millət vəkili həmin gün Pirallahı Rayon İcra Hakimiyyəti başçısının müavini Zülfiyyə Məmmədhüseynova ilə birlikdə Pirallahı qəsəbə məscidinə də baş çəkmiş, məscidin imamı ilə görüşərək dini-mənəvi dəyərlərimizin qorunması və təşviqi istiqamətində görülən işlər barədə məlumat almışdır. Məscidin nəzdində fəaliyyət göstərən kitabxana ilə də tanış olan qonaqlar burada yaradılmış şəraitə və təşəbbüslərə yüksək qiymət vermişlər. Səfər çərçivəsində qadınlar üçün nəzərdə tutulmuş ibadətxana hissəsinə də baxış keçirilmiş, burada qadınların rahat ibadət etmələri üçün yaradılan şərait müsbət dəyərləndirilmişdir.

Günün sonunda millət vəkili Günay Əfəndiyeva və RİH başçısının müavini Zülfiyyə Məmmədhüseynova Vətən müharibəsi şəhidi Nəbiyev Elmar Elman oğlunun, eləcə də bir günlük antiterror əməliyyatları zamanı qəhrəmancasına şəhid olmuş Cahangirov Tural Qələmhüseyn oğlunun ailələrini ziyarət etmişlər. Görüş zamanı şəhid ailələrinin qayğı və ehtiyacları dinlənilmiş, onların həlli istiqamətində müvafiq dəstəyin göstəriləcəyi bildirilmişdir. Rəsmilər, şəhid ailələrinin dövlətin və xalqın daim xüsusi diqqət və qayğısı ilə əhatə olunduğunu qeyd etmişlər. Şəhid ailələri isə öz növbələrində göstərilən diqqət və qayğıya görə ölkə rəhbərliyinə və dövlət nümayəndələrinə minnətdarlıqlarını ifadə etmişlər.