ABŞ Rusiyanı Ukrayna ilə görüşməyə və müharibənin sülh yolu ilə həllinə nail olmaq üçün lazımi addımları atmağa çağırıb. Əks halda, Moskva sanksiyalarla üzləşəcək.

SİA-nın məlumatına görə, bunu The Guardian yazır.

Qeyd olunur ki, bu xəbərdarlıq Rusiyaya BMT Təhlükəsizlik Şurasının cümə günü, avqustun 29-da keçirilən fövqəladə iclası zamanı edilib.

İclas Rusiyanın avqustun 28-nə keçən gecə ən azı 20 nəfərin ölümünə səbəb olan Ukraynaya irimiqyaslı birləşmiş zərbəsindən sonra çağırılıb.

ABŞ-ın BMT-dəki səfiri vəzifəsini icra edən Con Kelli deyib ki, Rusiyanın hücumları “Moskvanın sülhə nail olmaq istəyinin ciddiliyini şübhə altına alır”.

O, Rusiyadan Ukraynaya zərbələri dayandırmağı tələb edib. Kelli həmçinin Vladimir Putini Ukrayna prezidenti Vladimir Zelenski ilə görüşməyə çağırıb və müharibənin davam edəcəyi təqdirdə ABŞ-ın Rusiyaya qarşı sanksiyalar tətbiq edə biləcəyi barədə xəbərdarlıq edib.

ABŞ Rusiyaya qarşı ağrılı sanksiyalar tətbiq etməyə qadirdir

…“Politico” daha əvvəl yazmışdı ki, Rusiya iqtisadiyyatına ən ağrılı zərbəni Avropa Birliyi deyil, ABŞ vurmağa qadirdir. Nəşr hesab edir ki, Moskva ilə ticarət aparan ölkələrə qarşı ikinci dərəcəli sanksiyalar təcavüzkarın imkanlarına ciddi təsir göstərə bilər.

Qeyd olunur ki, Vladimir Putin yalnız ABŞ-ın Rusiya neftinin alınmasına görə Hindistana yüksək rüsumlar tətbiq etməsindən sonra ABŞ prezidenti Donald Trampla Alyaskada görüşməyə razılaşıb.

Əli Babayev