Hindistan avtomobil, avtomobil komponentləri və elektronika da daxil olmaqla, Rusiyaya ixracını genişləndirməyi planlaşdırır.

SİA xəbər verir ki, bu barədə Hindistanın Rusiya Federasiyasındakı səfiri Vinay Kumar məlumat verib.

Diplomatın sözlərinə görə, artımın əsas istiqamətləri avtomobillər və ehtiyat hissələri, tikinti materialları, tekstil, moda malları, həmçinin İT məhsulları, xüsusən də smartfonlar olacaq.

Hindistan ixracının hazırkı həcmləri potensialdan aşağıdır ki, bu da əməkdaşlıq üçün yeni imkanlar açır.

Deyim ki, avtomobil sənayesinə xüsusi diqqət yetirilir.

Hindistan avtomobil sənayesi Tata Motors, Mahindra, Maruti Suzuki, Hyundai, Kia, Toyota Kirloskar, Honda və Renault kimi markaların avtomobillərini istehsal edən dünyanın ən böyüklərindən biridir.

TASS xəbər verir ki, bu brendlər Hindistanın daxili bazarının əsasını təşkil edir və hazırda Çin istehsalçılarının üstünlük təşkil etdiyi, satışın 50 faizindən çoxuna nəzarət edən Rusiya Federasiyasında yer tuta bilər.

…Yəni Hindistan avtomobilləri və komponentləri Çin modellərinə əsl alternativ ola bilər. Bu, Rusiya bazarına idxalı şaxələndirməyə və bir təchizatçıdan asılılığı azaltmağa imkan verəcək.

Hindistanın planları bazarda güc balansını əhəmiyyətli dərəcədə dəyişə və alıcılara avadanlıq alarkən daha çox seçim imkanı verə bilər.

Əli Babayev