Ekvador prezidenti Daniel Noboa ABŞ prezidenti Donald Trampdan narkotik kartelləri ilə mübarizədə kömək istəyib. SİA bu barədə Noboanın Sucesos radiostansiyasına müsahibəsinə istinadla xəbər verir.

“Biz xahiş etmişik ki, hazırda vətəndaşlarımızın əmin-amanlığını pozan narkotik-terror qrupları terrorçular siyahısına salınsın”, – o deyib.

Noboa xatırladıb ki, ABŞ qanunları xaricdə ABŞ-ın düşməni kimi tanınan terrorçulara qarşı hərbi güc tətbiq etməyə icazə verir.

Ekvadorlu siyasətçi bunu Floridadakı Mar-a-Laqo malikanəsində Trampla şəxsi görüşdən sonra deyib. Onun sözlərinə görə, Amerika lideri ilə qeyri-rəsmi söhbəti zamanı miqrantlarla mübarizə və Venesuelaya qarşı sanksiyalar, habelə narkotiklərin qanunsuz dövriyyəsi və qeyri-qanuni balıq ovuna qarşı mübarizə üçün Ekvador sularında patrul xidmətində hərbi əməkdaşlıq mövzusu da qaldırılıb.

Noboa hazırda Ekvadorda aprelin 12-də keçiriləcək prezident seçkilərinin ikinci turuna hazırlaşır.