Mayın 17-də Bakıda Azərbaycan Autizm Assosiasiyasının “Sea Breeze”lə tərəfdaşlıq çərçivəsində təşkil etdiyi V Autizm Festivalı baş tutacaq. SİA xəbər verir ki, tədbir saat 10:00-dan 18:00-dək Nigar Rəfibəyli küçəsində yerləşən Fəvvarələr meydanında keçiriləcək. Təşkilatçıların bildirdiyinə görə, festivalın məqsədi autizmli insanların sosial inteqrasiyasına dəstək vermək, onların yaradıcılıq qabiliyyətlərini nümayiş etdirmək və cəmiyyətin autizm spektr pozuntusu (ASP) barədə məlumatlılığını artırmaqdır.

Festival proqramına təntənəli açılış mərasimi, konsert, xüsusi bacarıqlı uşaqların əl işlərindən ibarət sərgi, müxtəlif yaradıcılıq və təlim sahələri üzrə tematik zonalar, reabilitasiya və təhsil müəssisələrinin layihələrinin təqdimatları daxildir.

Festivalın geniş auditoriyasını dövlət qurumlarının nümayəndələri, sahibkarlar, ictimai xadimlər, bloqerlər, həmçinin ASP-li uşaqlar və gənclər, onların ailələri təşkil edəcək.

Azərbaycan Autizm Assosiasiyası autizmli şəxslərin dəstəklənməsi, reabilitasiyası və cəmiyyətə inteqrasiyası sahəsində səylərin koordinasiyası məqsədilə yaradılmış bir birlikdir.