Məqsəd miqrantların yerləşdiyi yeri də izləyəcək mobil proqram vasitəsilə qeydiyyata alınması üçün yeni sistemi sınaqdan keçirməkdir…

…Federasiya Şurası 2025-ci ildən 2029-cu ilə qədər Moskva və Moskva vilayətində pilot layihənin həyata keçirilməsinə dair qanunu təsdiqləyib. Məqsəd miqrantların yerləşdiyi yeri də izləyəcək mobil proqram vasitəsilə qeydiyyata alınması üçün yeni sistemi sınaqdan keçirməkdir.

SİA-nın məlumatına görə, qanuna əsasən, Rusiyada əcnəbi vətəndaşların qeydiyyatının təkmilləşdirilməsi üzrə eksperiment 2025-ci il sentyabrın 1-də başlayacaq və 2029-cu il sentyabrın 1-də başa çatacaq.

Eksperimentə Rusiyada işləmək üçün həm patentli, həm də patentsiz vizasız rejimə malik ölkələrdən olan əmək miqrantları cəlb olunacaq.

Həmçinin Rusiyaya səfər məqsədini dəyişən və 90 gündən artıq pilot rayonlarda olan, işləmək üçün gəlməyən miqrantlar da reyestrə daxil ediləcəklər.

İstisnalar diplomatlar, konsullar, onların ailə üzvləri, Belarus vətəndaşları və diplomatik pasport sahibləri üçün edilir. Eksperiment miqrantlar və onların hərəkəti haqqında məlumatların toplanması və təhlilinin yeni üsullarının sınaqdan keçirilməsi, əlavə qeydiyyat mexanizmlərinin effektivliyinin qiymətləndirilməsi, miqrasiya qanunvericiliyinin dəyişdirilməsi ilə bağlı təkliflərin hazırlanması məqsədi daşıyır.

Layihə Rusiya Federasiyasının Daxili İşlər Nazirliyi tərəfindən əlaqələndiriləcək, Moskva və Moskva vilayətinin icra hakimiyyətləri kömək edəcəklər.

Eksperimentin iştirakçıları miqrasiya xidmətlərinə müraciət edərkən mobil proqramda qeydiyyatdan keçməli, məlumatların emalına razılıq verməli və yerləşdikləri yer haqqında məlumat göndərməli olacaqlar.

Hər hansı bir yer dəyişikliyi üç gün ərzində tətbiq vasitəsilə bildirilməlidir.

Qeydiyyatın ləğvi üçün əsas üç iş günündən artıq müddətdə miqrantın cihazının geolokasiyasına dair məlumatların olmaması olacaq.

Bu halda qalma üçün qanuni əsaslar olmadıqda, onun haqqında məlumatlar nəzarət edilən şəxslərin reyestrinə daxil edilir.

Qanun bir regionda patent almış əmək miqrantlarının digər bölgədə işləməsi, regionlar arasında müvafiq razılaşma olduqda isə işəgötürənlərin belə mütəxəssisləri işə götürməsi imkanı yaradır.

Moskvanın, Moskva vilayətinin, Sankt-Peterburqun və Leninqrad vilayətinin yüksək vəzifəli şəxsləri belə müqavilələr bağlaya biləcəklər.

Əli Babayev