Aylarla məhrumiyyətlərə və işgəncələrə məruz qaldığı iddia edilir…

…Aylarla davam edən qeyri-müəyyənlikdən sonra 2022-ci ilin fevralında genişmiqyaslı işğalın başlamasından qısa müddət sonra Ukraynanın şərqində Rusiya qüvvələri tərəfindən saxlanılan amerikalı təqaüdçü və keçmiş müəllim Stiven Ceyms Hubbardın ailəsi onun harada olduğunu öyrənib. O, Mordoviyadakı Rusiya həbsxanalarından birində saxlanılır.

SİA-nın məlumatına görə, bu barədə “The New York Times” yazır.

Hazırda 73 yaşlı Stiven Hubbard Rusiya tərəfindən Ukrayna tərəfində döyüşməkdə ittiham edilib və 2024-cü ilin oktyabrında “muzdlu əsgər” elan edilib.

Lakin hökmdən sonra ailə uzun müddət onun harada olması barədə məlumat ala bilməyib – işin materialları ictimaiyyətdən çıxarılıb.

Hubbard bu yaxınlarda Kiprdə olan oğluna zəng edə bilib, bu, uzun müddət sonra ailəsi ilə ilk əlaqə olub.

Hubbard, vəkili Martin De Lukanın sözlərinə görə, işgəncələr və pis şərait də daxil olmaqla ağır çətinliklərə tab gətirib. Onunla eyni həbsxanada olan ukraynalı hərbi əsirlər onun məhz amerikalı olduğuna görə məruz qaldığı qəddar rəftardan danışıblar.

Birləşmiş Ştatlar Stiven Hubbardın qanunsuz həbs edildiyini rəsmən tanıyıb və mümkün məhbus mübadiləsi ilə bağlı Rusiya ilə danışıqlar aparır.

Rusiya tərəfi hələlik bu məsələyə münasibət bildirməyib. Hubbard Ukraynada yaşayıb, onlayn olaraq ingilis dilini tədris edib və Rusiya hakimiyyətinin iddia etdiyi kimi ərazi müdafiə qüvvələrinə qoşulmayıb.

Habbard işi Ukraynadakı münaqişə kontekstində Rusiya ilə ABŞ arasında münasibətlərdə ən mübahisəli məsələlərdən biri olaraq qalır.

Əli Babayev