Çoxlarımız o mənzərənin şahidi olmuşuq ki, dava-dalaş edən qadınlar, eləcə də kişilər bir-birinin ünvanına yazılı və şifahi ədəbiyyatda yazılan, deyilən hər cür söyüş, təhqir və qarğışları deyirlər. Bəzən tərəflər o dərəcədə əsəbi, hirsli və qəzəbli olurlara ki, ağızları köpüklənə -köpüklənə “səni görüm işığın sönsün” deməklə son nöqtəni qoyurlar. Açığı bu qarğışın mənasını tam şəkildə anlamaqda çətinlik çəkirəm. Sadəcə, hiss etdiyim ondan ibarətdir ki, deyəsən, bu qarğış çox dəhşətli qarğışdır. Nədən ki, birincisi nurla əlaqəlidir, ikincisi isə, dava-dalaşın girişində deyil, sonda yağdırılır. Mənə qarğışın mənasını tam formada dərk etmək, anlamaq çətinlik yaradır. Açığı interneti də ələk-vələk elədim, bu qarğışın mənasını öyrənə bilmədi. Ancaq narahat olmadım, çünki anlayıram ki, bu qarğışın dərin mənası olmasa elimizin-obamızın qarğışlar külliyyatına daxil edilməz. Faiq adında dostum deyir ki, “Səni görüm işığın kəsilsin” qarğışı insan həyatını alt-üst etmək üçün deyilir. Yəni içinə-çalatına gedən nur kəsilsin.

Faiq dostumuzun yozmasını eşidəndə çox pərişan və narahat oldum. Çünki insanın doğrudan da nuru kəsilsə, onun həyatının sonu olar. Həm də nur ilahi varlığı təcəssüm etdirən ifadədir. Bəzi hallarda insanlar “nur haqqı”, “işıq haqqı” deyib, and da içirlər. İndi bu ilahi ifadəni qarğış formasında səslənməsi adamın canına üşütmə salır. Ən dəhşətlisi odur ki, çox zaman insanlar idarə və müəssisədən əliboş geri qayıdanda, həmin idarənin və müəssisənin rəhbərinə qarğış edib, deyirlər ki, “görüm tezliklə işığın kəsilsin”.

Oxucuları əmin edim ki, idarə və müəssisə rəhbərlərinə və icra orqan işçilərinə yağdırılan qarğışların 80-90 faizi öz həllini tapır. 12 + Qax rayon icra hakimiyyətinin başçısının həbs olunması, eləcə də bələdiyyə rəhbərlərinin, həkimlərin cinayət məsuliyyətinə cəlb olunmasının özəyini insanların qarğışları təşkil edir.

Son vaxtlar dəmir yollarında hərəkət edən nəqliyyat vasitələrindən istifadə edən əhali “Azərbaycan Dəmir Yolları” Qapalı Səhmdar Cəmiyyətinin rəhbərliyinə qarğışlar yağdırırlar. Çünki dəmir yolunda vəziyyət həqiqətən də ağır və faciəvidir. Stansiyalarda antisanitariya hökm sürür, oturacaqlar bərbad vəziyyətdədir, insanların qatarları gözləyərkən qışda qardan, çovğundan, yayda isə günəşin yandırıcı şüasından qorunması üçün normal dayanacaqlar yoxdur. Qatarların təzə alındığı bildirilsə də, tez-tez sıradan çıxdığının şahidi olur və ya məlumatlar eşidirik. O gün bir hadisənin şahidi oldum. Deməli, 2025-ci il iyunun 2-də “Azərbaycan Dəmir Yolları” Qapalı Səhmdar Cəmiyyətininin xətti ilə milyonlarla ABŞ dollarına alınan elektrik qatarı paravozun qoşqusunda Sumqayıtdan Bakıya daşınırdı. Yəqin ki, həmin sıradan çıxan qatar ya metalloma göndəriləcək, ya da zavoda qaytarılacaq. Sual olunur, nədən köhnə qatarların alqı –satqısını həyata keçirsiniz? Niyə dövlətin büdcəsindən ayrılan milyonlarla maliyyə vəsaitini gərəksiz texnikaların, lazımsız ehtiyat hissələrinin alınmasına və nəhayət, üzü təzə, içi köhnə olan qatarları alıb, Bakıya gətirirsiniz. Bu kimi biabırçılığa aydınlıq gətirən rəhbər şəxsin olmaması “Azərbaycan Dəmir Yolları” Qapalı Səhmdar Cəmiyyətində idarəetmənin bərbad vəziyyətində olmasından xəbər verir.

“Azərbaycan Dəmir Yolları” Qapalı Səhmdar Cəmiyyəti fəaliyyətini düzgün qura bilməməsi nəticəsində Bakı və ətraf qəsəbələrə hərəkət edən sürət qatarlarının mənzil başına çatmasında gecikmə halları yaranır. Xüsusilə, Biləcəri stansiyasında qatarların gecikməsi adi hala çevrilib. Əksər hallarda isə stansiyanın işıqları sönür. Açığı bilmək olmur, stansiyada işıqların sönməsi əhalinin “Azərbaycan Dəmir Yolları” Qapalı Səhmdar Cəmiyyətinin rəhbərliyinə ünvanladıqları “sizi görüm işığınız sönsün” qarğışının nəticəsidir, yoxsa Bakı elektrik şəbəkəsinin oyunudur. Hər iki halda görünən ondan ibarətdir ki, “Azərbaycan Dəmir Yolları” Qapalı Səhmdar Cəmiyyətinin Biləcəri stansiyasında sürət qatarlarını gecikməsi ilə yanaşı tez-tez işıqlar da sönür. Sərnişinlər stansiyada işıqlar söndüyü üçün qatarlara minərkən turnegetlərdən istifadə edə bilmirlər. Bu da onların cərimələnməsi ilə nəticələnir. Çünki “Azərbaycan Dəmir Yolları” Qapalı Səhmdar Cəmiyyətinin qurduğu əndərəbadi oynuna görə bir stansiyada qatara minən sərnişin sonuncu stansiyada kartını elektron tabloya vurub çıxış etməlisən. Biləcəri stansiyasında işıqlar söndüyü üçün kartı elektron tabloya vuraraq giriş etmək mümkün deyil. Çıxışda kartlar elektron tabloya vurulsa da, bu hal ikitərəfli olmadığı üçün sərnişin 2 -3 manat cərimələnir. Deməli, bir ay ərzində 7-8 dəfə Biləcəri stansiyasında işıqlar sönərsə, bu sərnişinlərin əlavə olaraq 30 manat itirməsi deməkdir. Yəni onsuzda qazancları aşıb-daşan “Azərbaycan Dəmir Yolları” Qapalı Səhmdar Cəmiyyətinin rəhbərliyinin cibinə sərnişinlərin cərimələri hesabına əlavə maliyyə vəsaitləri daxil olur.

Ümid edirik ki, “Azərbaycan Dəmir Yolları” Qapalı Səhmdar Cəmiyyəti özündə güc tapacaq və əhalini narahat edən, narazı salan problemlərin aradan qaldırılmasına nail olacaq. Əgər bacarmırlarsa və ya işləmk istəmirlərsə, necə deyərlər qapı açıqdır.

İLHAM ƏLİYEV