Ukrayna kəşfiyyatı logistik çöküşdən xəbər tutub…?

Sanksiyalar Kalininqrada ənənəvi təchizat yollarını məhv edib. Dəniz daşımaları artıb, lakin logistika çökür.

SİA-nın məlumatına görə, bu barədə Ukrayna Xarici Kəşfiyyat Xidməti bildirib.

2022-ci ildə sanksiyaların tətbiqindən sonra Rusiya ölkənin qalan hissəsi ilə quru əlaqəsi olmayan, yəni anklav olan Kalininqrad vilayətinə yük tranziti üçün xərclərini xeyli artırıb.

Əvvəllər tədarükün əksəriyyəti Litvadan keçirdisə, indi bu marşrut kvota və sanksiyalara görə ciddi şəkildə məhdudlaşdırılıb.

Buna görə də yük dəniz yollarına keçib. Əgər 2019-cu ildə kabotaj yük dövriyyəsi 0,4 milyon tona yaxın olubsa, 2024-cü ildə Oboronlogistics şirkəti dəniz yolu ilə 2 milyon tondan çox yük daşıyıb.

Bununla belə, həcmlərin artımı zəif məqamları üzə çıxarıb – bərə infrastrukturunda həddən artıq yüklənmə var: növbələr, yer çatışmazlığı və donanmanın azalması fasiləsiz çatdırılmanı təmin etməyi çətinləşdirir.

İndi kiçik bizneslər üçün xüsusilə çətindir – iri operatorlar inzibati resurslardan istifadə edərək bərələrdə yerləri əvvəlcədən ehtiyatda saxlayır və kiçik daşıyıcıları bazardan effektiv şəkildə sıxışdırırlar.

Sanksiyalar təkcə logistikanı pozmur, həm də Kalininqradın təchizat sisteminin zəifliyini nümayiş etdirərək regionun sosial-iqtisadi problemlərini kəskinləşdirir.

Əli Babayev