2025-ci ildə Rusiya-Çin ticarəti müharibə başlayandan bəri ilk dəfə azalmağa başladı…

…2025-ci ildə Rusiya-Çin ticarəti müharibə başlayandan bəri ilk dəfə azalmağa başlayıb.

SİA-nın əldə etdiyi məlumata görə, bunu Rusiyanın sənaye və ticarət naziri Anton Əlixanov bildirib.

Çin gömrüyünün məlumatına görə, ikitərəfli ticarət dövriyyəsi əvvəlki üç ildə təxminən iki dəfə artdıqdan sonra yanvar-iyul aylarında illik müqayisədə 8 faiz azalaraq 125,8 milyard dollara düşüb.

…Bu il biz qarşılıqlı ticarətdə müəyyən azalma müşahidə edirik, – Əlixanov etiraf edib

…Belə dinamikanın səbəbləri, əlbəttə ki, çoxşaxəlidir, – o, davam edib.

…Bura sanksiyaların və xarici iqtisadi təzyiqin digər formalarının ölkələrimizə mənfi təsiri və müəyyən əmtəə bazarlarında qeyri-sabitlik daxildir. Biz həmçinin Çin məhsullarının müəyyən bazar seqmentlərində tədricən doymasını, eləcə də həm Rusiyada, həm də Çində daxili iqtisadi prosesləri qeyd edirik.

…Qaydar İnstitutunun statistik məlumatlarına görə, Çin ilin birinci yarısında Rusiyada demək olar ki, bütün əsas xammalın alışını azaldıb.

Neft tədarükü 11 faiz (49,11 milyon tona qədər), neft məhsulları 28 faiz (5,51 milyon tona), LNG 13 faiz (3,22 milyon tona), taxta 10 faiz (4,53 milyon tona), kömür 10 faiz (38,97 milyon tonadək) azalıb.

Çinə boru kəməri qazının tədarükü 23 faiz, o cümlədən sənaye metalları: nikel 94 faiz, alüminium 91 faiz, mis 2 dəfədən çox artıb.

…Qaydar İnstitutunun məlumatına görə, Çindən Rusiyaya tədarük də 9 faiz azalıb, ilk növbədə avtomobil idxalı 61 faiz azalıb.

Əlixanovun sözlərinə görə, Çinlə ticarətin əvvəlki sürətli artımına qayıtmaq olmayacaq.

…Orta müddətli perspektivdə yüksək texnologiyalı və innovativ məhsulların payının ardıcıl artması ilə qarşılıqlı ticarətdə əvvəlkindən daha mülayim artım templəri gözləməliyik, – deyə o bildirib.

Əli Babayev