Sentyabrın 14-dən etibarən Qazaxıstanda hava gəmilərinin idarə edilməsinə maneə törətməyə, o cümlədən təyyarələrə və pilotsuz uçuş aparatlarına lazer cihazlarının yönəldilməsinə görə cinayət məsuliyyəti nəzərdə tutan qanun qüvvəyə minəcək. SİA xəbər verir ki, bu barədə Qazaxıstan Nəqliyyat Nazirliyinin mətbuat xidməti məlumat yayıb. Bildirilib ki, bu tədbir sərnişinlərin və ekipaj üzvlərinin həyat və sağlamlığını təhlükə altına sala biləcək qəzalara yol verilməsinin qarşısını almağa yönəlib.

Qeyd olunur ki, lazer şüaları real təhlükə yaradır. Onlar pilotu kor edə və ya müvəqqəti görmə itkisinə səbəb ola bilər ki, bu da xüsusilə qalxış və eniş zamanı kritik hesab olunur.

Vurğulanır ki, bu cür hərəkətlərin təhlükəli və qanunsuz olmasını hamı dərk etməlidir. Qanunu pozanları azadlıqdan məhrumetməyədək cəza gözləyir.